Stola jocunditatis alleluia Induit hodie dominus

Stola jocunditatis alleluia Induit hodie dominus militem suum Laurentium Solito plaudat alacrior concio laeta fidelium Hodie martyr insignis hostiam Deo placentem obtulit Hodie tormentum graviter examinatus pertulit Animatus ad certamen monitu beati senis Gravissimis non refugit exhibere membra poenis Ante regem accersitur et de rebus convenit occultis ecclesiae Sed non cedit blandimentis emollitus aut tormentis ejus avaritiae Luditur Valerianus et Levitae larga manus dum petit indutias Dat ministra caritatis pauperibus congregatis facultatum copias Furit igitur praefectus et paratur ardens lectus insultantis viscera crates urit aspera Sudat martyr in agone spe mercedis et coronae quae datur fidelibus pro Christo certantibus De cujus militia coeli gaudet curia Quia vicit hodie ministros nequitiae Ut hunc ergo per patronum consequamur vitae donum In illius die festo chorus noster laetus esto jocundum in ecclesia decantent alleluia alleluia